කෘත්‍රිම බුද්ධිය වර්තමාන ලෝකයේ පුළුල්ව සාකච්ඡාවට බඳුන් වන කරුණකි. මේ වන විටත් තාක්ෂණයේ නව මං පෙත් හරහා කෘත්‍රිම බුද්ධිය නීති ක්ෂේත්‍රය ඇතුළු තවත් බොහෝ ප්‍රධාන ක්ෂේත්‍ර පුළුල් ලෙස වෙනස් කරමින් පවතී.
නීතිඥවරුන්ට මේ වෙනස කෙසේ බලපායිද? AI යනු මනුෂ්‍ය ආදේශකයක් ද?
මෙවන් වූ ප්‍රශ්න සඳහා ඔබත් පිළිතුරු සොයනවා ඇති.
ඔබ අත්දැකීම් බහුල නීතිඥයෙක් වුවත් , තරුණ නීතිඥයෙක් වුවත් , නීති ශිෂ්‍යයෙක් වුවත්, නැතහොත් අනාගතයේදී නීතිඥයන් වෙනුවට කෘත්‍රිම බුද්ධිය ආදේශ වේදැයි කුතුහලයෙන් පසුවන කෙනෙක් වුවත්, අවධානය යොමු කල යුතු කරුණ වන්නේ, කෘත්‍රිම බුද්ධිය (AI) හා මිනිස් බුද්ධිය නීතිය සම්බන්ධ කටයුතු වලදී කුමන අයුරින් ක්‍රියා කරනවාද යන්නයි.
නීති ක්ෂේත්‍රයේදී, AI හි සහ මිනිස් බුද්ධියේ භූමිකා වෙන් වෙන්ව තේරුම් ගැනීමට නම්, කෘත්‍රිම බුද්ධියේ ක්‍රියාකාරිත්වය සඳහා මූලික අවශ්‍යයතාවක් වන දත්ත (data) සහ කරුණු (information) වලට වඩා වැඩි යමක් නීති ක්ෂේත්‍රයේ භාවිතා වන ආකාරය හඳුනා ගැනීම අත්‍යවශ්‍ය වේ.
මිනිස් හැඟීම් සහ තීරණ ගැනීමේ හැකියාව දත්ත වලට පමණක් සීමා නොවන අතර, එවැනි තීන්දු සාධනීයව තේරුම් ගැනීමට මිනිස් මනස මෙන්ම අත්දැකීම්ද අත්‍යාවශ්‍ය වේ.
මිනිසුන් කියවා ගැනීම, ඔවුන්ගේ සිතුම් පැතුම්, අරමුණු, හැසිරීම් රටා තේරුම් ගැනීමේ සිට සංකීර්ණ මිනිස් ක්‍රියාකාරකම් වටහා ගැනීම දක්වා මනුෂ්‍ය බුද්ධිය නීති ක්ෂේත්‍රයට වැදගත් වන්නේ කෙසේද, කෘත්‍රිම බුද්ධියට (AI) එවැනි දේ කිරීමේ හැකියාව කෙතරම් ද යන්න ගවේෂණය කරමු.
